မြန်မာနိုင်ငံသတင်းမီဒီယာကောင်စီ၏ သတင်းထုတ်ပြန်ချက် ၃/၂၀၁၉

Print

၂၀၁၉ ခုနှစ်၊ ဖေဖော်ဝါရီလ (၈) ရက်၊ သောကြာနေ့


                ၂၀၁၈ခုနှစ်၊ ဒီဇင်ဘာလ(၂၈)ရက်က ရတနာပုံတက္ကသိုလ်ရှေ့တွင် ကျောင်းသားအချို့ဆန္ဒထုတ်ဖော်မှုဖြစ်စဉ်ကို သတင်းရယူနေသည့် သတင်းသမားများအား ရုက္ခဗေဒဌာန၊ပါမောက္ခ(ဌာနမှူး)
ဒေါက်တာခင်သက်ကျော်က နှုတ်ဖြင့် စော်ကားပြောဆိုခဲ့ခြင်းသည် သတင်းသမားများ၏တာဝန်ကို ဟန့်တားခြိမ်းခြောက်ပြောဆိုခဲ့ခြင်းဖြစ်ကြောင်း၊ ယင်းအတွက် မြန်မာနိုင်ငံသတင်းမီဒီယာကောင်စီအနေဖြင့်
ဖြေရှင်းဆောင်ရွက်ပေးပါရန် မန္တလေးအခြေစိုက်သတင်းသမားများက မြန်မာနိုင်ငံသတင်းမီဒီယာကောင်စီသို့၂၀၁၈ခုနှစ်၊ ဒီဇင်ဘာလ(၂၉) ရက်နေ့စွဲဖြင့် တိုင်ကြားစာပေးပို့လာပါသည်။

               ထိုတိုင်ကြားစာကို ဖြေရှင်းဆောင်ရွက်ပေးနိုင်ရန်အတွက် မြန်မာနိုင်ငံသတင်းမီဒီယာကောင်စီ၊ အငြင်းပွားမှုနှင့် တိုင်ကြားမှုများ ညှိနှိုင်းဖြေရှင်းရေးကော်မတီသည်၊ သတင်းမီဒီယာဥပဒေ၊
နည်းဥပဒေများအရ တိုင်ကြားသူနှင့် တိုင်ကြားခံရသူ တို့အား ၂၀၁၉ခုနှစ်၊ ဇန်န၀ါရီ(၃၁)ရက်တွင် မြန်မာနိုင်ငံသတင်းမီဒီယာကောင်စီရုံးသို့ ဖိတ်ကြားခဲ့ပါသည်။

               ထိုသို့ဖိတ်ကြားရာတွင် တိုင်ကြားသူဖက်ကလာရောက်ခဲ့ပြီး၊ တိုင်ကြားခံရသူဖက်မှ လာရောက်ခြင်းမရှိပါ။ သို့ရာတွင် ရတနာပုံတက္ကသုိုလ်ပါမောက္ခချုပ် ဒေါက်တာမောင်မောင်နုိုင်ထံမှ ဇန်န၀ါရီ ၂၈ ရက်နေ့
နေ့စွဲဖြင့် မြန်မာနုိုင်ငံသတင်းမီဒီယာကောင်စီသုို့ ပေးပို့သော အကြောင်းပြန်ကြားစာတွင်၊ တာဝန်ချိန်၌ နုိုင်ငံတော် တာဝန်ထမ်းဆောင်နေသော ပါမောက္ခဒေါက်တာခင်သက်ကျော်သည် သတင်းထောက်များ၏
သတင်းရယူပုိုင်ခွင့်ကို တားဆီးပိတ်ပင်သည့်သဘော၊ ရုိုက်နှက်စေခုိုင်းခဲ့ခြင်းသဘောမရှိပါကြောင်း၊ ရတနာပုံတက္ကသုိုလ်တွင် တာဝန်ချိန်အတွင်း သတင်းရယူရန် ခွင့်ပြုချက် တောင်းခံထားသော
သတင်းမီဒီယာသမားများ မရှိပါကြောင်း မြန်မာနိုင်ငံသတင်းမီဒီယာကောင်စီသို့ အကြောင်းပြန်ကြားခဲ့ပါသည်။

               မြန်မာနိုင်ငံသတင်းမီဒီယာကောင်စီသည် သတင်းမီဒီယာနည်းဥပဒေ ၃၆(ခ)အရ တိုင်ကြားခံရသူ ပါမောက္ခ ဒေါက်တာခင်သက်ကျော်အား ၂၀၁၉ခုနှစ်၊ ဖေဖော်ဝါရီ(၇)ရက်တွင် မြန်မာနိုင်ငံ
သတင်းမီဒီယာကောင်စီရုံးသို့ လာရောက် ရန် ဒုတိယအကြိမ် ထပ်မံဖိတ်ကြားခဲ့သော်လည်း လာရောက်မှုမရှိခဲ့ပါ။

              ရတနာပုံတက္ကသိုလ်မှ ဒေါက်တာခင်သက်ကျော်သည် ၎င်းအပေါ်တိုင်ကြားထားချက်နှင့် စပ်လျဉ်း၍ အကြောင်းကြားချက်ရရှိသော်လည်း၊ သတင်းမီဒီယာကောင်စီနှင့် ပူးပေါင်းဆောင်ရွက်ခြင်းမရှိ၊
စွပ်စွဲချက်အပေါ် ဖြေရှင်းခြင်းမပြု၊ ဖြေရှင်းလွှာတစ်စုံတစ်ရာကိုလည်း တင်ပြခြင်းမရှိ၊ ပျက်ကွက်သည်ဖြစ်၍ စွပ်စွဲချက်အပေါ် အငြင်းမပွား ဟုသဘော သက်ရောက်ပါသည်။

             နိုင်ငံတော်၏ စတုတ္ထမဏ္ဍိုင်ဖွံ့ဖြိုးရေး၊ ဒီမိုကရေစီကျင့်စဉ်တရားများ ရှင်သန်ရေးအတွက် ဥပဒေပြဌာန်းချက် များနှင့်အညီ ဆောင်ရွက်နေသော မြန်မာနိုင်ငံသတင်းမီဒီယာကောင်စီ၏ ဖြေရှင်းညှိနှိုင်း
ဆောင်ရွက်မှုအပေါ် ပြေလည်ရာပြေလည်ကြောင်း လက်တွဲပူးပေါင်းဆောင်ရွက်ခြင်းမရှိ၊ ဖြေရှင်းချက်တစ်စုံတစ်ရာ မပြုသည့်အတွက် သတင်းမီဒီယာ ကောင်စီ နည်းဥပဒေပုဒ်မ ၂၀(ဂ)အရ လည်းကောင်း၊
နည်းဥပဒေပုဒ်မ ၃၈ (ဆ) အရ လည်းကောင်း ကောင်စီအနေဖြင့် ကြေညာချက်ထုတ်ရမည့် အခြေအနေသို့ရောက်ရှိလာခဲ့ပါသည်။

             ဒေါက်တာဒေါ်ခင်သက်ကျော်သည် တစ်ဖက်စွပ်စွဲသကဲ့သို့ လူပုဂ္ဂိုလ်တစ်ဦးအနေဖြင့် သတင်းမီဒီယာအပေါ် ကျင့်ဝတ်နှင့်မညီ နှောက်ယှက်ခဲ့သည်ဟု ကောက်ယူရမည်ဖြစ်ပါသည်။
သို့ပါ၍ မြန်မာနိုင်ငံသတင်းမီဒီယာကောင်စီအနေဖြင့် စတုတ္ထမဏ္ဍိုင်အဖြစ် ရပ်တည်ကာကွယ်ပေးရမည့် သတင်းလွတ်လပ်ခွင့်ကို ဟန့်တားရာရောက်ခဲ့သည်ဟု ကောက်ယူရမည်ဖြစ်ကြောင်း ကြေညာအပ်ပါသည်။

မြန်မာနိုင်ငံသတင်းမီဒီယာကောင်စီ