မြစ်ကြီးနားဂျာနယ်မှ သတင်းထောက်နှစ်ဦးကို သခင်စစ် ကုမ္ပဏီက လှည့်ဖျားခေါ်ဆောင်ပြီး အနိုင်အထက် ပြုကျင့်မှုအပေါ် သဘောထား ထုတ်ပြန်ချက်

           

ယနေ့ နံနက်ပိုင်းတွင် မြစ်ကြီးနား သတင်းဂျာနယ်မှ သတင်းထောက်နှစ်ဦးကို ကချင်ပြည်နယ်ရှိ တစ်ရှူးငှက်ပျော စိုက်ပျိုးရေး လုပ်ကိုင်နေသည့် သခင်စစ် ကုမ္ပဏီက ၎င်းတို့ ရုံးခန်းသို့ လှည့်ဖျားခေါ်ဆောင်ပြီး
အမျိုးသမီး သတင်းထောက်အား ဂျာနယ်ဖြင့် ပါးရိုက်ခြင်း၊ အမျိုးသားသတင်းထောက်ကို ထိုင်ထ အကြိမ်ရာနှင့်ချီ လုပ်ခိုင်းခြင်းများ ပြုလုပ်ခဲ့သည်ဟု သိရှိရသည်။

            ၎င်းသတင်းထောက်များသည် သတင်းမီဒီယာဥပဒေ၊ ကျင့်၀တ်များနှင့်အညီ နိုင်ငံသားတိုင်း သိခွင့်ရှိသော နိုင်ငံသားများ၏ အခွင့်အရေး ဆုံးရှုံးမှုဆိုင်ရာ ကိစ္စရပ်များကို ဖော်ထုတ် ရေးသားခြင်းသာဖြစ်သည်။
သတင်းဖေါ်ပြမှုနှင့် ပတ်သက်ပြီး ကျေနပ်မှု မရှိပါက အဆိုပါ ကုမ္ပဏီအနေဖြင့် မြန်မာနိုင်ငံ သတင်းမီဒီယာကောင်စီသို့ တိုင်ကြားခြင်း သို့တည်းမဟုတ် တရားဥပဒေ လမ်းကြောင်းအရ တရားစွဲဆိုခြင်းတို့ လုပ်ဆောင်ခွင့် ရှိသော်လည်း ယခုကဲ့သို့ သတင်းထောက်များအပေါ် ရာဇ၀တ် မကင်းသော အနိုင်အထက် လုပ်ဆောင်ခွင့်မရှိပါ၊ ယင်းသို့ အနိုင်အထက် လုပ်ဆောင်ခဲ့ခြင်းကို မြန်မာနိုင်ငံ သတင်းမီဒီယာကောင်စီအနေဖြင့် ပြင်းထန်စွာ ရှုတ်ချပါသည်။

             ၎င်းဖြစ်ရပ်တွင် ကျူးလွန် ပါဝင်သူများကို တရားဥပဒေနှင့် အညီ ထိရောက်စွာ ဖော်ထုတ် အရေးယူပေးပါရန် တရားဥပဒေ စိုးမိုးရေး တာဝန်ရှိ အဖွဲ့အစည်းဖြစ်သည့် ပြည်ထဲရေး ၀န်ကြီးဌာနနှင့်
ကချင်ပြည်နယ် အစိုးရတို့ထံသို့ မြန်မာနိုုင်ငံ သတင်းမီဒီယာကောင်စီက တိုက်တွန်းပါသည်။

        အခြား လိုအပ်သော ပူးပေါင်းဆောင်ရွက်မှုများကို မြန်မာနိုင်ငံ သတင်းမီဒီယာကောင်စီအနေဖြင့် အစွမ်းကုန် လုပ်ဆောင်သွားမည်ဖြစ်ကြောင်း အသိပေးအပ်ပါသည်။

               

မြန်မာနိုင်ငံသတင်းမီဒီယာကောင်စီ

ဆက်သွယ်ရန်

အမှတ် ၃၉၂ - ၃၉၆၊ ကုန်သည်လမ်း၊ (၉)ရပ်ကွက်၊ ဗိုလ်တထောင်မြို့နယ်၊ ရန်ကုန်မြို့။

ဖုန်း -09448026326

အီးမေးလ် : mmpresscouncil@gmail.com

ထုတ်ပြန်ချက်ဆိုင်ရာများ

© 2016 mpc. All Rights Reserved.