ျမန္မာႏိုင္ငံသတင္းမီဒီယာေကာင္စီ၏သေဘာထားထုတ္ျပန္ခ်က္ (၈/၂၀၁၉)
.
၂၀၁၉ ခုႏွစ္၊ ေမလ (၃) ရက္၊ ေသာၾကာေန႔

            ၂၀၁၉ ခုနှစ်၊ မေလ (၃) နေ့ရက်သည်(၂၆) ကြိမ်မြောက် ကမ္ဘာ့သတင်း လွတ်လပ်ခွင့်နေ့ ဖြစ်သည်။ ဆောင်ပုဒ်မှာ “Media for Democracy : Journalism and Elections in Times of Disinformation”
ဒီမိုကရေစီအတွက်မီဒီယာ၊ လုပ်ကြံသတင်း ခေတ်အတွင်းမှ သတင်းအတတ်ပညာနှင့် ရွေးကောက်ပွဲများ ဖြစ်သည်။

            ယခုနှစ်တွင် ကမ္ဘာ့သတင်း လွတ်လပ်ခွင့်နေ့ အခမ်းအနားကို မြန်မာနိုင်ငံ သတင်းမီဒီယာကောင်စီက ဦးဆောင်ပြီး စတင် ကျင်းပခြင်းဖြစ်သည်။

           လူ့အခွင့်အရေး ကြေညာစာတမ်း အပိုဒ် (၁၉)တွင်လည်းကောင်း ၂၀၀၈ ခုနှစ် ဖွဲ့စည်းပုံ အခြေခံဥပဒေ ပုဒ်မ ၃၅၄ (က) တွင်လည်းကောင်း၊ လွတ်လပ်စွာ ထုတ်ဖော်ပြောဆိုခွင့်၊ ရေးသားဖြန့်ဝေခွင့်များ ပေးထား
သည်ကို တွေ့ရမည်ဖြစ်သည်။ သတင်းမီဒီယာဥပဒေ ပုဒ်မ ၃(က) တွင် နိုင်ငံတော် ဖွဲ့စည်းပုံ အခြေခံ ဥပဒေပါ ပြဋ္ဌာန်းချက် နှင့်အညီ နိုင်ငံသားတိုင်း လွတ်လပ်စွာ ရေးသား ထုတ်ဝေ ဖြန့်ချိခွင့်ရှိ သည့် သတင်းမီဒီယာ
လုပ်ငန်းများ ဖြစ်ပေါ်စေရန်၊ သတင်းမီဒီယာ လုပ်ငန်းသည် စတုတ္ထ မဏ္ဍိုင် အဖြစ် ပီပြင်စွာ ရပ်တည်နိုင်စေရန်၊ သတင်းမီဒီယာ သမားများ၏ ရပိုင်ခွင့်နှင့် လွတ်လပ်ခွင့်များ အပြည့်အဝ ရရှိစေရန် လည်းကောင်း၊
ပုဒ်မ ၄ တွင်လည်း သတင်းမီဒီယာ သမားများ၏ ရပိုင်ခွင့်များကိုလည်း ပြဋ္ဌာန်းထားသည်။

           ယခုအခါ မြန်မာနိုင်ငံတွင် သတင်းလွတ်လပ်ခွင့်နှင့် ပတ်သက်ပြီး စိန်ခေါ်မှုများ ရှိနေသည်ကို တွေ့ရသည်။ သတင်းသမားများအား သတင်းမီဒီယာဥပဒေဖြင့် မဟုတ်ဘဲ မတရားအသင်း အက်ဥပဒေ (၁၇/၁)၊
ဆက်သွယ်ရေး ဥပဒေပုဒ်မ ၆၆(ဃ)၊ နိုင်ငံတော် အကြည်ညိုပျက်မှု ၅၀၅(က) (ခ)၊ အစိုးရ လျို့ဝှက်ချက်များ အက်ဥပဒေ ပုဒ်မများဖြင့် တရားစွဲဆိုခြင်း၊ ဖမ်းဆီးထိန်းသိမ်းခြင်း၊ ထောင်ဒဏ် အပြစ်ပေးခြင်း တို့သည်
ဒီမိုကရေစီ နိုင်ငံအတွက် ဆီလျော်မှု မရှိဟု မှတ်ယူပါသည် ။ သတင်းမီဒီယာများကို ကျေနပ်မှု တစ်စုံတစ်ရာ မရှိပါက လက်ရှိ သတင်းမီဒီယာ ဥပဒေဖြင့်သာ တရားစွဲဆိုသင့်ပြီး သတင်းမီဒီယာကောင်စီသို့ ရှေးဦးစွာ တိုင်ကြားသင့်ပါသည်။

           သတင်းသမားများ၊ သတင်းအချက်အလက် ရယူမှုတွင် ခက်ခဲခြင်း၊ ပုဂ္ဂလိက သတင်းမီဒီယာများ ရပ်တည်မှု ခက်ခဲလာခြင်း တို့သည်လည်း စိန်ခေါ်မှုများအဖြစ် တည်ရှိနေသည်ကိုလည်း တွေ့ရသည်။

           ကမ္ဘာ့သတင်း လွတ်လပ်ခွင့် အညွှန်းကိန်းတွင် မြန်မာနိုင်ငံသည် ၂၀၁၇ ခုနှစ်တွင် အဆင့် (၁၃၁) တွင် ရပ်တည်ခဲ့ရာမှ ၂၀၁၈ ခုနှစ်တွင် (၁၃၇)၊၂၀၁၉ ခုနှစ်တွင် အဆင့် (၁၃၈) ထိ ရောက်ရှိ နေသည်။
ယင်းသည် ဒီမိုကရေစီ လမ်းကြောင်းပေါ် စတင်လျှောက်လှမ်းနေသည့် မြန်မာနိုင်ငံအနေဖြင့် ကြုံတွ့ရမည့် စိန်ခေါ်မှုတစ်ခုပင် ဖြစ်သည်။

           ၂၀၂၀ ပြည့်နှစ်တွင် မြန်မာနိုင်ငံ၌ အထွေထွေ ရွေးကောက်ပွဲကြီး ကျင်းပမည်ဖြစ်သည်။ သတင်းမီဒီယာများ ပိုမို လွတ်လပ်စွာ သတင်းရယူရေး၊ သတင်းသမားများကို အကာအကွယ်ပေးရေးနှင့် လုပ်ကြံ
သတင်းများကိုလည်း သတိထားစောင့်ကြည့် သွားရမည့် အရေးကိစ္စ တစ်ခုဖြစ်သည်။

           သတင်းလွတ်လပ်ခွင့်နှင့် ဒီမိုကရေစီ ရှင်သန်ရေးသည် ဆက်စပ်နေသည့်အတွက် သတင်း လွတ်လပ်ခွင့်များ ကျဆင်းလာပါက ဒီမိုကရေစီ စနစ်ကိုလည်း ထိခိုက်စေမည်ဖြစ်သည်။

           မြန်မာနိုင်ငံတွင် သတင်းလွတ်လပ်ခွင့် စံနှုန်းများ ပြန်လည်မြင့်တက်လာရေး၊ မြန်မာနိုင်ငံ၏ သတင်း လွတ်လပ်ခွင့် အဆင့် ပြန်လည် မြင့်တက်လာရေးတို့အတွက် လက်ရှိ ဒိီမိုကရေစီ အစိုးရ အနေဖြင့် သတင်းမီဒီယာများ၊ သတင်းသမားများကို လွတ်လပ်စွာ သတင်းရယူ ရေးသားခွင့်များ ပိုမိုဖန်တီးပေးရန် လိုအပ်ပါသည်

          အလားတူ ပြည်ထောင်စု လွှတ်တော်အနေဖြင့်လည်း သတင်းမီဒီယာ လွတ်လပ်ခွင့် ကို အဟန့်အတား ဖြစ်လျှက်ရှိသော ဥပဒေများကိုလည်း ပြန်လည် သုံးသပ် ပြင်ဆင်ပေးစေလိုပါကြောင်း
ယနေ့ ကျရောက်သည့် (၂၆) ကြိမ်မြောက် ကမ္ဘာ့သတင်း လွတ်လပ်ခွင့်နေ့တွင် မြန်မာနိုင်ငံ သတင်းမီဒီ ယာကောင်စီက တိုက်တွန်းလိုက်ရ ပါသည်။


မြန်မာနိုင်ငံသတင်းမီဒီယာကောင်စီ

ဆက်သွယ်ရန်

အမှတ် ၃၉၂ - ၃၉၆၊ ကုန်သည်လမ်း၊ (၉)ရပ်ကွက်၊ ဗိုလ်တထောင်မြို့နယ်၊ ရန်ကုန်မြို့။

ဖုန်း -09448026326

အီးမေးလ် : mmpresscouncil@gmail.com

ထုတ်ပြန်ချက်ဆိုင်ရာများ

© 2016 mpc. All Rights Reserved.

Please publish modules in offcanvas position.