မြန်မာနိုင်ငံ သတင်းမီဒီယာကောင်စီ သဘောထားထုတ်ပြန်ချက် ၉/၂၀၁၉
၂၀၁၉ ခုနှစ်၊ မေလ (၁၆) ရက်၊ ကြာသပတေးနေ့

               ယခုလပိုင်းအတွင်း သတင်းမီဒီယာ သမားများကို သတင်းမီဒီယာ ဥပဒေနှင့် မသက်ဆိုင်သည့် အခြား ဥပဒေပုဒ်မများဖြင့် အမှုဖွင့် တိုင်ကြားခြင်း၊ ခေါ်ယူမေးမြန်း စစ်ဆေးခြင်း၊ ဖမ်းဆီး ချုပ်နှောင်ခြင်း
တို့ကို ပြုလုပ် လာကြောင်းတွေ့ရသည်။

                 ၂၀၁၉ ခုနှစ်၊ ဧပြီလ (၁၂) ရက်နေ့တွင် ဧရာဝတီ သတင်းဌာန Website တွင် ဖော်ပြခဲ့သော “သတင်းထောက်တစ်ဦး၏ မြောက်ဦးမှတ်တမ်း” ဆောင်းပါးနှင့် ပတ်သက်၍ ဧရာဝတီသတင်းဌာန၏
အကြီးတန်း အယ်ဒီတာတစ်ဦးဖြစ်သူအား ရန်ကုန်တိုင်း စစ်ဌာနချုပ်မှ ဆက်သွယ်ရေး ဥပဒေပုဒ်မ ၆၆(ဃ) ဖြင့် ကျောက်တံတား ရဲစခန်းတွင်လည်းကောင်း၊ မေလ(၁)ရက်တွင် ရခိုင်ပြည်နယ်အခြေစိုက် Development
Media Group (DMG) ၏ အယ်ဒီတာချုပ်နှင့် တာဝန်ရှိသူများအား သတင်းတပ်ဖွဲ့ (SB) မှ မတရားအသင်း အက်ဥပဒေ ပုဒ်မ(၁၇/၂) ဖြင့် စစ်တွေမြို့အမှတ် (၁) ရဲစခန်းတွင်လည်းကောင်း၊ မေလ(၁၅)ရက်တွင်
မန္တလေးတိုင်းဒေသကြီး၊ ပုသိမ်ကြီးမြို့နယ်၊ အောင်သပြေကျေးရွာတွင် ဖြစ်ပွားခဲ့သော ဆန္ဒပြပွဲတွင် သတင်းယူနေသည့် Channel Mandalay News Agency မှ သတင်းထောက် နန္ဒ (တစ်ကိုယ်တော်) အား
ပုသိမ်ကြီး မြို့မရဲစခန်းမှ ဖမ်းဆီးထိန်းသိမ်းခဲ့ခြင်း တို့ဖြစ််ပွားခဲ့သည်။

               ထိုဖြစ်ရပ်များနှင့် ပတ်သက်၍လည်း မြန်မာနိုင်ငံ သတင်းမီဒီယာကောင်စီက တိုင်ကြားစာများ လက်ခံရရှိ ခဲ့ပါသည်။

               မြန်မာနိုင်ငံ သတင်းမီဒီယာကောင်စီသည် ဧပြီ (၃၀) ရက်နေ့က ပြုလုပ်ခဲ့သော မဏ္ဍိုင် (၄) ရပ်တွေ့ဆုံပွဲ တွင် ရရှိခဲ့သည့် သဘောတူညီချက် (၁၃) ချက်မှ အပုဒ် (၃) တွင် “သတင်းအချက်အလက် ရယူခြင်းနှင့် ပတ်သက်၍ စိန်ခေါ်မှုများကို ပူးပေါင်း ဖြေရှင်းရာတွင် မဏ္ဍိုင် (၄) ရပ်အကြား အပြန်အလှန် လေးစားမှုကို  အခြေခံလျက် ဆောင်ရွက်သွားရန်” သဘောတူခဲ့ပြီး ဖြစ်ပါသည်။

              မေလ (၃) ရက်နေ့က ပြုလုပ်ခဲ့သည့် ကမ္ဘာ့သတင်း လွတ်လပ်ခွင့်နေ့တွင် ထုတ်ပြန်ခဲ့သော မြန်မာနိုင်ငံ သတင်း မီဒီယာကောင်စီ၏ သဘောထား ထုတ်ပြန်ချက်တွင်လည်း “သတင်းသမားများအား သတင်းမီဒီယာ ဥပဒေဖြင့် မဟုတ်ဘဲ မတရားအသင်း အက်ဥပဒေ (၁၇/၁)၊ (၁၇/၂)၊ ဆက်သွယ်ရေး ဥပဒေပုဒ်မ ၆၆(ဃ)၊ နိုင်ငံတော် အကြည်ညိုပျက်မှု ၅၀၅(က) (ခ)၊ အစိုးရ လျှို့ဝှက်ချက်များ အက်ဥပဒေ ပုဒ်မများဖြင့်
တရားစွဲဆိုခြင်း၊ ဖမ်းဆီး ထိန်းသိမ်းခြင်း၊ ထောင်ဒဏ် အပြစ်ပေးခြင်းတို့သည် ဒီမိုကရေစီနိုင်ငံအတွက် ဆီလျော်မှုမရှိဟု မှတ်ယူပါသည်။ သတင်းမီဒီယာများကို ကျေနပ်မှု တစ်စုံတစ်ရာမရှိပါက လက်ရှိ သတင်းမီဒီယာ ဥပဒေဖြင့်သာ တရားစွဲဆိုသင့်ပြီး သတင်းမီဒီယာကောင်စီသို့ ရှေးဦးစွာ တိုင်ကြားသင့်ပါသည်” ဟု ထုတ်ပြန်ကြေညာခဲ့ပြီး ဖြစ်ပါသည်။

              မြန်မာနိုင်ငံ သတင်းမီဒီယာကောင်စီသည် မဏ္ဍိုင် (၄) ရပ်အကြား အပြန်အလှန် နားလည်မှု တိုးတက် ကောင်းမွန်အောင် ပူပေါင်း ဆောင်ရွက်လျက်ရှိပြီး တပ်မတော်နှင့်လည်း အလုပ်ရုံဆွေးနွေးပွဲများ ပူးပေါင်း လုပ်ဆောင်လျက်ရှိပါသည်။

             ထိုကဲ့သို့ ဆောင်ရွက်နေဆဲကာလတွင် ယခုကဲ့သို့ သတင်းသမားများကို သတင်းမီဒီယာ ဥပဒေနှင့် မသက်ဆိုင်သည့် အခြားဥပဒေပုဒ်မများဖြင့် အမှု ဖွင့်တိုင်ကြားခြင်း၊ ခေါ်ယူမေးမြန်း စစ်ဆေးခြင်း၊ ဖမ်းဆီး ချုပ်နှောင်ခြင်းတို့ လုပ်ဆောင်နေခြင်းတို့သည် မဖြစ်သင့်၊ မဖြစ်ထိုက်သော လုပ်ဆောင်ချက်များ ဖြစ်ကြောင်း မြန်မာနိုင်ငံ သတင်းမီဒီယာကောင်စီအနေဖြင့် သုံးသပ်ပါသည်။

            ထိုကဲ့သို့ ဆောင်ရွက်ထားမှုများအပေါ် သက်ဆိုင်ရာက ပြန်လည် သုံးသပ်စဉ်းစားဖို့ လိုကြောင်းနှင့် သတင်းမီဒီယာများကို ကျေနပ်မှု တစ်စုံတစ်ရာမရှိပါက လက်ရှိ သတင်းမီဒီယာ ဥပဒေဖြင့်သာ
တရားစွဲဆိုသင့်ပြီး သတင်းမီဒီယာကောင်စီသို့ ရှေးဦးစွာ တိုင်ကြားသင့်ပါသည်။

           သတင်းမီဒီယာများ၊ သတင်းသမားများအနေဖြင့်လည်း သတင်းမီဒီယာ ဥပဒေပါ အခန်း (၃) သတင်းမီဒီယာ သမားများ၏ ရပိုင်ခွင့်များ၊ အခန်း (၄) သတင်းမီဒီယာ သမားများ လိုက်နာရမည့် တာဝန်နှင့် ကျင့်ဝတ်များကို လေးစားလိုက်နာကြဖို့ လိုအပ်ပါကြောင်း သဘောထားထုတ်ပြန်ပါသည်။

မြန်မာနိုင်ငံသတင်းမီဒီယာကောင်စီ

ဆက်သွယ်ရန်

အမှတ် ၃၉၂ - ၃၉၆၊ ကုန်သည်လမ်း၊ (၉)ရပ်ကွက်၊ ဗိုလ်တထောင်မြို့နယ်၊ ရန်ကုန်မြို့။

ဖုန်း -09448026326

အီးမေးလ် : mmpresscouncil@gmail.com

ထုတ်ပြန်ချက်ဆိုင်ရာများ

© 2016 mpc. All Rights Reserved.

Please publish modules in offcanvas position.