မြန်မာနိုင်ငံသတင်းမီဒီယာကောင်စီ၏ သတင်းထုတ်ပြန်ချက် ၅/၂၀၁၇

 

၁။       ရိုက်တာသတင်းဌာနမှ မြန်မာသတင်းထောက်နှစ်ဦးဖြစ်သည့် ကိုကျော်စိုးဦး   ( ခ ) မိုးအောင်နှင့် ကိုသက်ဦးမောင် ( ခ ) ဝလုံးတို့အား (၁၉၂၃) ခုနှစ် မြန်မာနိုင်ငံလျှို့ဝှက်ချက်များဥပဒေပုဒ်မ ၃ ဖြင့် ဖမ်းဆီးခဲ့ကြောင်း ပြန်ကြားရေးဝန်ကြီးဌာန၏ (၂၀၁၇) ခုနှစ် ဒီဇင်ဘာ (၁၃) ရက်နေ့ ထုတ်ပြန်ချက်အရသိရှိရပါသည်။

၂။       မြန်မာနိုင်ငံသတင်းမီဒီယာကောင်စီ၏သတင်းမီဒီယာကျင့်ဝတ်တွင် အောက်ပါအတိုင်းပြဋ္ဌာန်းထားပါသည်။
အပိုဒ် (၃)။    ။ ပေါက်ကြားလာသော အကြောင်းအရာများ ကန့်သတ် သတင်းအချက်အလက်များနှင့်သတင်းရင်းမြစ်ကို ကာကွယ်ခြင်း။
        ၃.၁ ။         ။မီဒီယာဌာနတစ်ခုသည် ပေါက်ကြားလာသော ဌာနဆိုင်ရာနှင့် အခြားသတင်းအချက်များ (ဥပမာ - နိုင်ငံရေးသမားများနှင့် ပြည်သူ့ဝန်ထမ်းများထံမှ အချက်အလက်များ)ကို အများပြည်သူ အကျိုးစီးပွားဖြစ်စေသည်ဟု ခိုင်လုံပါက လူသိရှင်ကြား ထုတ်ဖော်ရမည့် ပရော်ဖက်ရှင်နယ် တာဝန်ရှိသည်။ မီဒီယာကျင့်ဝတ်က ဤတာဝန်ဝတ္တရားကို ထောက်ခံသည်။
         ၃.၂ ။          ။ မီဒီယာဌာနများသည် လျှို့ဝှက်အပ်သော သတင်းရင်းမြစ်များကို ကာကွယ်ပေးရန် ကျင့်ဝတ်အရ တာဝန်ရှိပြီး မီဒီယာလုပ်ငန်းစဉ် တစ်ရပ်လုံးတွင် ထိုလျှို့ဝှက်ချက်ကို အသိရှိရှိလေးစားလိုက်နာရန် လိုအပ်သည်။ ထိုသို့ ကာကွယ်ပေးရန် တာဝန်ရှိမှုကို ဤမီဒီယာကျင့်ဝတ်က ထောက်ခံသည်။
         ထို့အပြင် ၂၀၁၄ ခုနှစ်၊ မေလ ၁၄ရက်နေ့တွင် ပြည်ထောင်စုလွှတ်တော်က အတည်ပြု ပြဋ္ဌာန်းထားသော သတင်းမီဒီယာဥပဒေပုဒ်မ ၂၁ တွင်လည်း “ နစ်နာသောဌာန၊ အဖွဲ့အစည်းသို့မဟုတ် ပုဂ္ဂိုလ်သည် သတင်းမီဒီယာသမားတစ်ဦးက ပုဒ်မ ၉ တွင် ပြဋ္ဌာန်းထားသည့် တာဝန်နှင့် ကျင့်ဝတ်သိက္ခာတစ်ရပ်ရပ်ကို ချိုးဖောက်ကြောင်း ယူဆလျှင် ရှေးဦးစွာကောင်စီသို့ တိုင်ကြားနိုင်သည် ” ဟုဖေါ်ပြထားပါသည်။
 
၃။ အထက်ပါ ပြဋ္ဌာန်းချက်များအရ မြန်မာနိုင်ငံ သတင်းမီဒီယာကောင်စီက - မိမိတို့ ရပ်တည်ချက်ကို အောက်ပါအတိုင်း တင်ပြအပ်ပါသည်။
         ၁။  ယခုဖမ်းဆီးခံနေရသော သတင်းထောက်နှစ်ဦးကိစ္စကို သတင်းမီဒီယာ ဥပဒေအရဖြေရှင်းခွင့်ရလျှင် ဖြေရှင်းပေးလိုပါသည်။
         ၂။  အကယ်၍ ထိုသတင်းထောက်နှစ်ဦးအား တရားရုံးတင် စစ်ဆေးမည်ဆိုပါက လိုအပ်လျှင် Expert Witness ကျွမ်းကျင်သူ အသိသက်သေအနေဖြင့် သတင်းမီဒီယာကောင်စီမှ ဆောင်ရွက်လိုပါသည်။
         ၃။ ထိုသတင်းထောက်နှစ်ဦးအတွက် တရားမျှတသော ဆုံးဖြတ်ချက်များဖြစ်ရန် Legal assistance ဥပဒေရေးရာအထောက်အကူ လိုအပ်ပါက သတင်းမီဒီယာကောင်စီအား လုပ်ဆောင်ခွင့်ပေးစေလိုပါသည်။
         ၄။  မြန်မာနိုင်ငံသတင်းမီဒီယာကောင်စီအနေဖြင့် သတင်းမီဒီယာကျင့်ဝတ်ဆိုင်ရာ တိကျမှု၊ ဘက်မလိုက်မှုနှင့် မျှတမှုများ၊ ပေါက်ကြားလာသော အကြောင်းအရာများ၊ ကန့်သတ် သတင်းအချက်အလက်များနှင့် သတင်းရင်းမြစ် ကာကွယ်ခြင်းတို့နှင့် စပ်လျဉ်း၍ ရပ်တည် လုပ်ဆောင်သွားမည် ဖြစ်ကြောင်း ကြေညာအပ်ပါသည်။
          

  နိုင်ငံတကာအသိုင်းအဝိုင်းအကြား နိုင်ငံတော်၏ ပုံရိပ်ကျဆင်းနေပြီး၊ အချုပ်အခြာအာဏာ ခြိမ်းခြောက်ခံနေရချိန်တွင် အထက်ပါနည်းလမ်းများသည် အသင့်တော်ဆုံး ဖြစ်သည်ဟု မြန်မာနိုင်ငံ သတင်းမီဒီယာကောင်စီ အနေဖြင့် အလေးအနက် ယူဆယုံကြည်ပါသည်။

 

မြန်မာနိုင်ငံသတင်းမီဒီယာကောင်စီ

ဆက်သွယ်ရန်

အမှတ် ၃၉၂ - ၃၉၆၊ ကုန်သည်လမ်း၊ (၉)ရပ်ကွက်၊ ဗိုလ်တထောင်မြို့နယ်၊ ရန်ကုန်မြို့။

ဖုန်း -09448026326

အီးမေးလ် : [email protected]

ထုတ်ပြန်ချက်ဆိုင်ရာများ

© 2016 mpc. All Rights Reserved.