မြန်မာနိုင်ငံသတင်းမီဒီယာကောင်စီ

အမှတ် (၁၃၆၊ ၁၃၈)၊(A+B) ၊ ၃၅လမ်း(လယ်) ၊ ကျောက်တံတားမြို့နယ်၊ရန်ကုန်မြို့ ။

ဖုန်း- ၀၉ ၄၄၈၀၂၆၃၂၆

                                                                                                                                                                                                                                                                                                                          

ရက်စွဲ ။    ။ ၂၀၁၈ ခုနှစ်၊ စက်တင်ဘာလ (၄) ရက်။

ကြေညာချက် အမှတ် ၃/၂၀၁၈

၁။    ရိုက်တာ သတင်းထောက်နှစ်ဦးဖြစ်သည့် ကိုသက်ဦးမောင် (ခ) ဝလုံးနှင့် ကိုကျော်စိုးဦး (ခ) မိုးအောင်တို့အား မြန်မာနိုင်ငံအစိုးရ လျှို့ဝှက်အက်ဥပဒေဖြင့် ရန်ကုန်တိုင်းဒေသကြီး၊ ရန်ကုန်မြောက်ပိုင်းခရိုင်တရားရုံးမှ
      ၂၀၁၈ ခုနှစ်၊ စက်တင်ဘာလ (၃) ရက်နေ့တွင် ထောင်ဒဏ် (၇) နှစ်ချ မှတ်လိုက်ကြောင်း မြန်မာနိုင်ငံ သတင်းမီဒီယာကောင်စီမှ ဝမ်းနည်းစွာ သိရှိရပါသည်။

၂။    ပြည်ထောင်စုလွှတ်တော်က အတည်ပြုပြဋ္ဌာန်းသော သတင်းမီဒီယာ ဥပဒေအခန်း (၂)၊ ပုဒ်မ ၃(ဂ) တွင်သတင်းမီဒီယာသမားများ၏ ရပိုင်ခွင့်နှင့် လွတ်လပ်ခွင့်များ အပြည့်အဝရရှိစေရန် မြန်မာနိုင်ငံ သတင်းမီဒီယာ ကောင်စီက ဆောင်ရွက်ရမည်ဟု ဆိုထားပါသည်။ အခန်း(၃)၊ ပုဒ်မ(၄) (၅) (၆) (၇) (၈) တို့အရ သတင်းမီဒီယာသမားများသည် လွတ်လပ်စွာ သတင်းအချက်အလက် တောင်းယူပိုင်ခွင့်နှင့် ဖော်ထုတ် ရေးသားပိုင်ခွင့်ရှိပါသည်။ ၂၀၀၈ ဖွဲ့စည်းပုံအခြေခံဥပဒေ ပုဒ်မ၃၅၄ (က)တွင်လည်း မိမိ၏ ယုံကြည်ချက်၊ ထင်မြင်ယူဆချက်များကို လွတ်လပ်စွာထုတ်ဖော် ပြောဆိုခွင့်ရေးသား ဖြန့်ဝေခွင့်ရှိပါသည်။

၃။    ရိုက်တာ သတင်းထောက်နှစ်ဦးဖြစ်သည့် ကိုသက်ဦးမောင် (ခ) ဝလုံးနှင့် ကိုကျော်စိုးဦး (ခ) မိုးအောင် တို့အား ဖမ်းဆီးခံရချိန်တွင် ထိုကိစ္စကို သတင်းမီဒီယာဥပဒေအရ လည်းကောင်း၊ တရားရုံးတင် စစ်ဆေးမည်ဆိုပါက လိုအပ်လျှင် Expert Witness  ကျွမ်းကျင်သူ အသိသက်သေအဖြစ် သတင်းမီဒီယာကောင်စီမှ  ဆောင်ရွက်လိုပါကြောင်း၊ တရားမျှတသည့် ဆုံးဖြတ်ချက်ဖြစ်စေရန် Legal Assistance ဥပဒေရေးရာ အထောက်အကူ လိုအပ်ပါက သတင်းမီဒီယာကောင်စီအား ဆောင်ရွက်ခွင့်ပေးရန် (၂၀.၁၂.၂၀၁၇)နေ့က မြန်မာနိုင်ငံ သတင်းမီဒီယာကောင်စီက သဘောထား ထုတ်ပြန်ချက် (၅/၂၀၁၇)ဖြင့် ထုတ်ပြန်ခဲ့ပြီး
ဖြစ်ပါသည်။

၄။    ယခုကဲ့သို့ သတင်းမီဒီယာ သမားများကို အပြင်ထန်ဆုံး ဖိနှိပ် ချုပ်ချယ်လေ့ရှိသည့် ဗြိတိသျှ ကိုလိုနီခေတ် ဥပဒေတစ်ခုဖြစ်သည့် ၁၉၂၃ ခုနှစ် မြန်မာနိုင်ငံ အစိုးရ လျှို့ဝှက်အက်ဥပဒေဖြင့် အရေးယူ အပြစ်ပေး
 စီရင်ခြင်းသည် ၂၀၀၈ ဖွဲ့စည်းပုံ အခြေခံဥပဒေကိုလည်းကောင်း၊ သတင်းမီဒီယာဥပဒေကိုလည်းကောင်း မျက်ကွယ်ပြုရာ ရောက်ပေသည်။

၅။    ယင်းကဲ့သို့ လုပ်ဆောင်လိုက်ခြင်းသည် သတင်းသမားများ လွတ်လပ်စွာ သတင်းရယူဖော်ထုတ်ရေးသားပိုင်ခွင့်ကို ထိခိုက်စေရုံသာမက ပြည်သူများထံ သတင်း လွတ်လပ်ခွင့် စီးဆင်းမှုကိုလည်းကောင်း၊ ဒီမိုကရေစီနိုင်ငံတော်၏ ပုံရိပ်ကိုလည်းကောင်း များစွာထိခိုက်စေပါသည်။

၆။    သတင်းမီဒီယာဥပဒေအခန်း (၆)၊ ပုဒ်မ ၁၂ အရ  “ ကောင်စီသည် စာနယ်ဇင်းသမားများနှင့် စပ်လျဉ်း၍ ဤဥပဒေပါ ပြဋ္ဌာန်းချက်များနှင့်အညီ လွတ်လပ်စွာ ဆောင်ရွက်နိုင်သည့် တစ်ခုတည်း အဖွဲ့အစည်း
 ဖြစ်သည့်အပြင်၊ ပုဒ်မ၁၇ (စ) အရ ကောင်စီသည် လိုအပ်သည့် အချိန်တိုင်း သတင်းထုတ်ပြန်ခြင်းတို့ကို ဆောင်ရွက်ရန် မြန်မာနိုင်ငံ သတင်းမီဒီယာကောင်စီအား အခွင့်အာဏာ အပ်နှင်းထားပါသည်။

၇။    ထို့ကြောင့် ရိုက်တာ သတင်းထောက်နှစ်ဦးဖြစ်သည့် ကိုသက်ဦးမောင် (ခ) ဝလုံး နှင့် ကိုကျော်စိုးဦး (ခ) မိုးအောင် တို့အား မြန်မာနိုင်ငံ အစိုးရလျှို့၀ှက် အက်ဥပဒေဖြင့် ထောင်ဒဏ် (၇) နှစ်
       ချမှတ်လိုက်သည့်အပေါ် မြန်မာနိုင်ငံ သတင်းမီဒီယာကောင်စီမှ များစွာ ဝမ်းနည်းရပါကြောင်း ထုတ်ပြန်ကြေညာလိုက်ပါသည်။

(၄.၉.၂၀၁၈ နေ့တွင် ပြုလုပ်သည့် မြန်မာနိုင်ငံ သတင်းမီဒီယာကောင်စီ အရေးပေါ် အစည်းအဝေး ဆုံးဖြတ်ချက်အရ)

မြန်မာနိုင်ငံသတင်းမီဒီယာကောင်စီ

ဆက်သွယ်ရန်

အမှတ် ၃၉၂ - ၃၉၆၊ ကုန်သည်လမ်း၊ (၉)ရပ်ကွက်၊ ဗိုလ်တထောင်မြို့နယ်၊ ရန်ကုန်မြို့။

ဖုန်း -09448026326

အီးမေးလ် : [email protected]

ထုတ်ပြန်ချက်ဆိုင်ရာများ

© 2016 mpc. All Rights Reserved.