မြန်မာနိုင်ငံသတင်းမီဒီယာကောင်စီ
အငြင်းပွားမှုနှင့် တိုင်ကြားမှုများ ညှိနှိုင်းဖြေရှင်းရေးကော်မတီ
သတင်းထုတ်ပြန်ချက် ၇/၂၀၁၈
၂၀၁၈ ခုနှစ်၊ ဒီဇင်ဘာလ (၂၁) ရက်၊ သောကြာနေ့

 ၁။    မြန်မာနိုင်ငံ သတင်းမီဒီယာကောင်စီ ဥက္ကဋ္ဌ - ဦးအုန်းကြိုင် ဦးဆောင်သော ကောင်စီဝင်များနှင့် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ဦးဆောင်သော တပ်မတော်
အဆင့်မြင့် အရာရှိကြီးတို့သည် ယနေ့တွင် နေပြည်တော်ရှိ ဘုရင့်နောင်ရိပ်သာတွင် တွေ့ဆုံခဲ့ကြပါသည်။

၂။    ယင်းသို့ တွေ့ဆုံရာတွင် တပ်မတော်နှင့် သတင်းမီဒီယာအကြား နားလည်မှုနှင့် ယုံကြည်မှု တိုးတက်ကောင်းမွန်ရေး၊ သတင်းမီဒီယာသမားများ သတင်းအချက်အလက်များ ရယူရာတွင် တပ်မတော်မှ
လွယ်ကူ လျှင်မြန်စွာ ဆောင်ရွက်ပေးရေး၊ သတင်း အချက်အလက်များ ဆက်သွယ် ရယူနိုင်ရေးအတွက် ဆက်သွယ်ရမည့် Contact Person များ ထားရှိပေးရေး၊ တိုက်ပွဲများ၊ ပဋိပက္ခဖြစ်ပွားရာဒေသများသို့
သတင်းသမားများ သွားရောက် သတင်းရယူနိုင်ရေးနှင့် သက်ဆိုင်ရာက လုံခြုံမှုဆောင်ရွက်ပေးရေး၊ သတင်းစာ ရှင်းလင်းပွဲများ ကျင်းပပေးရေး၊ ဆောင်ရွက်လျက်ရှိသည့် တပ်မတော်နှင့် သတင်းမီဒီယာ
အလုပ်ရုံဆွေးနွေးပွဲများ ဆက်လက်ကျင်းပရေး၊ ပုဂ္ဂလိက သတင်းစာများ ရပ်တည်နိုင်ရေးအတွက် အကူအညီပေးရေး အပါအဝင် ရိုက်တာ သတင်းထောက်များကိစ္စ၊ မှုခင်းသတင်းထောက်များကိစ္စ၊
ငြိမ်းချမ်းရေးကိစ္စများကိုလည်း ဆွေးနွေးခဲ့သည်။

၃။    မြန်မာနိုင်ငံ သတင်းမီဒီယာကောင်စီနှင့် တပ်မတော် ကာကွယ်ရေးဦးစီးချုပ် တို့သည် ၂၀၁၆ ခုနှစ်၊ ဇန်နဝါရီလ (၂၄) ရက်တွင်လည်းကောင်း၊ ၂၀၁၈ ခုနှစ်၊ ဇွန်လ (၂) ရက်တွင်လည်းကောင်း
တွေ့ဆုံခဲ့သည်။ ယနေ့ မြန်မာနိုင်ငံ သတင်းမီဒီယာကောင်စီနှင့် တပ်မတော် ကာကွယ်ရေးဦးစီးချုပ်တို့ တွေ့ဆုံမှုသည် တတိယအကြိမ်မြောက် တွေ့ဆုံမှုဖြစ်ပြီး မြန်မာနိုင်ငံ သတင်းမီဒီယာကောင်စီ၏
ဒုတိယ သက်တမ်းတွင် ပထမဆုံး တွေ့ဆုံမှု ဖြစ်ပါသည်။

၄။    တွေ့ဆုံပွဲအပြီးတွင် “ပစ်ခတ် တိုက်ခိုက်မှု ရပ်စဲရေးနှင့် ထာဝရငြိမ်းချမ်းရေးအတွက် ထုတ်ပြန်ချက်” ကို တပ်မတော်မှ တရားဝင် ထုတ်ပြန် ကြေညာခဲ့ပါသည်။

၅။    မြန်မာနိုင်ငံ သတင်းမီဒီယာကောင်စီနှင့် တပ်မတော် ကာကွယ်ရေးဦးစီးချုပ်တို့ ယနေ့တွင် တွေ့ဆုံမှု သည် သတင်းမီဒီယာနှင့် တပ်မတော်အကြား အပြန်အလှန် နားလည်မှုနှင့် ယုံကြည်မှုတို့
ပိုမိုကောင်းမွန်အောင် ဆောင်ရွက်နိုင်ခဲ့ပြီး အောင်မြင်သောတွေ့ဆုံမှုဖြစ်ကာ နောက်ထပ်တွေ့ဆုံမှုများ ဆက်လက် ဆောင်ရွက်သွားမည်ဖြစ်ကြောင်း သတင်းထုတ်ပြန်အပ်ပါသည်။

ဆက်သွယ်ရန်

အမှတ် ၃၉၂ - ၃၉၆၊ ကုန်သည်လမ်း၊ (၉)ရပ်ကွက်၊ ဗိုလ်တထောင်မြို့နယ်၊ ရန်ကုန်မြို့။

ဖုန်း -09448026326

အီးမေးလ် : [email protected]

ထုတ်ပြန်ချက်ဆိုင်ရာများ

© 2016 mpc. All Rights Reserved.