မြန်မာနိုင်ငံသတင်းမီဒီယာကောင်စီ၏

ဝမ်းနည်းကြောင်း သတင်းထုတ်ပြန်ချက်

 

                                                                                                                                                                                                   

                                                                                                                                                                                               ၂၀၂၀ ပြည့်နှစ်၊ အောက်တိုဘာလ ၂၃ ရက်

            

မြန်မာနိင်ငံသတင်းမီဒီယာကောင်စီဥက္ကဋ္ဌဖြစ်သူ ဦးအုန်းကြိုင် (ဟံသာဝတီ - ဦးအုန်းကြိုင်) ၂၀၂၀ ပြည့်နှစ်၊ အောက်တိုဘာလ (၂၃) ရက် (ယနေ့) မွန်းလွဲ (၃နာရီ ၊ ၂၅ မိနစ်)တွင် ရန်ကုန်မြို့၊ တပ်မတော် ကုတင်(၁၀၀၀)ဆေးရုံကြီး၌ ကွယ်လွန်သွားပါသဖြင့် သတင်းမီဒီယာကောင်စီအနေဖြင့် တိုင်းတာမရနိုင်သော ဆုံးရှုံးမှုအတွက် ဝမ်းနည်းကြောင်း သတင်းထုတ်ပြန်အပ်ပါသည်။

ဦးအုန်းကြိုင်(ဟံသာဝတီ - ဦးအုန်းကြိုင်)သည် မြန်မာနိုင်ငံသတင်းမီဒီယာကောင်စီ၏ ပထမအကြိမ် သက်တမ်းဖြစ်သည့် ၂၀၁၅ ခုနှစ် မှ ၂၀၁၈ ခုနှစ်အထိ သတင်းမီဒီယာကောင်စီဝင်နှင့် ဒုတိယဥက္ကဋ္ဌ တာဝန်များကို အသီးသီးတာဝန်ယူလုပ်ကိုင်ခဲ့ပြီး လက်ရှိဒုတိယအကြိမ် သက်တမ်း ၂၀၁၈ ခုနှစ်မှ ယခုကွယ်လွန်ချိန် အထိ မြန်မာနိုင်ငံသတင်းမီဒီယာကောင်စီ၏ ဥက္ကဋ္ဌတာဝန်ကို ထမ်းဆောင်ခဲ့ပါသည်။

သတင်းမီဒီယာကောင်စီဥက္ကဋ္ဌအဖြစ် တာဝန်ထမ်းဆောင်စဉ်ကာလအတွင်း သတင်းရယူခွင့်ဆိုင်ရာ မဏ္ဍိုင်(၄)ရပ်ဆွေးနွေးပွဲများ၊ သတင်းသိပိုင်ခွင့်ဆိုင်ရာဥပဒေကြမ်းပေါ်ထွက်ရေး ဆွေးနွေးမှုများတွင် တက်ကြွစွာ ဦးဆောင်ပါဝင်ခဲ့ပါသည်။

ဦးအုန်းကြိုင် (ဟံသာဝတီ - ဦးအုန်းကြိုင်)သည် မြန်မာနိုင်ငံသတင်းမီဒီယာကောင်စီဥက္ကဋ္ဌ တာဝန် အပြင် အရှေ့တောင်အာရှ သတင်းမီဒီယာကောင်စီများကွန်ရက်တွင်လည်း ဒုတိယဥက္ကဋ္ဌတာဝန်ကိုပါ ပူးတွဲထမ်းဆောင်လျက် အရှေ့တောင်အာရှဒေသတွင်း သတင်းမီဒီယာကောင်စီများအကြား ကွန်ရက်ဆက်သွယ် ရေးကိစ္စရပ်များတွင်လည်း တက်ကြွစွာပါဝင်ဆောင်ရွက်ခဲ့ပါသည်။

ယခုကဲ့သို့ ဝါရင့်သတင်းစာဆရာကြီးတစ်ဦးနှင့် သတင်းမီဒီယာကောင်စီ၏ ဥက္ကဋ္ဌတစ်ဦး ကွယ်လွန် သွားခြင်းအတွက် မြန်မာနိုင်ငံသတင်းမီဒီယာကောင်စီအနေဖြင့် အစားထိုးမရသည့် ဆုံးရှုံးမှုတစ်ရပ်အဖြစ် မှတ်ယူပါကြောင်း မှတ်တမ်းတင်ထုတ်ပြန်အပ်ပါသည်။

 

                                                                                                                                                                                                                                                       မြန်မာနိုင်ငံသတင်းမီဒီယာကောင်စီ

 

ဆက်သွယ်ရန်

အမှတ် ၃၉၂ - ၃၉၆၊ ကုန်သည်လမ်း၊ (၉)ရပ်ကွက်၊ ဗိုလ်တထောင်မြို့နယ်၊ ရန်ကုန်မြို့။

ဖုန်း -09448026326

အီးမေးလ် : [email protected]

ထုတ်ပြန်ချက်ဆိုင်ရာများ

© 2016 mpc. All Rights Reserved.